Sheekh Shariif Oo ka Hadlay Ujeedka Safar Uu Maanta ku Tagay Magaalada Jowhar

Madaxweynihii hore ee Soomaaliya Sheekh Shariif Sh Axmed ayaa ka hadlay safarkii Maanta uu ku gaaray Magaalada Jowhar ee Xarunta Maamulka Hirshabeelle, iyadoo halkaas siweyn loogu soo dhaweeyay.

Sheekh Shariif oo warbaahinta la hadlay ayaa u sheegay in Jowhar uu u tegay sidii loo xalin ahaa tabashooyinka kala duwan ee laga qabo Doorashada Maamulka Hirshabeelle iyo sidii loo xalin lahaa wax kasta oo tabasho ah oo jira.

Waxaa uu u mahadceliyay Sheekh Shariif, Mas’uuliyiinta kala duwan ee Hirshabeelle oo uu horreeyo Guddoomiyaha Gobolka Shabeellaha Dhexe Axmed Faal, xubno kale oo ka tirsan Maamulka iyo dadweyne farabadan, kuwaasi oo siweyn u soo dhaweeyay Shariif.

Madaxweynihii hore ee Soomaaliya ayaa inta uu ku sugan yahay Jowhar waxaa uu kulan uu la qaadan doonaa Mas’uuliyiin ka tirsan Hirshabeelle, Xildhibaanad Cusub, siyaasiyiin iyo qeybaha kala duwan Bulshada, isagoo kala hadli doono arrimo kala duwan.

Socdaalka Madaxweynihii hore ee Soomaaliya ayaa waxaa ku soo aadayaa, iyadoo shalay si rasmi ah loo dhaariyay Xildhibaanada Cusub ee Baarlamaanka labaad ee Maamulka Hirshabeelle, kuwaasi oo doortay Guddoon KMG ah, iyagoona kadib dooran doona Guddoonka Baarlmaanka iyo Madaxweynaha hoggaamin doona Maamulkaas.