Madaxweynaha Puntland Oo Dib Ugu Laabtay Garoowe.(Sababta)

Madaxweynaha Puntland Mudane Siciid Cabdullaahi Deni oo maalmahan ku sugnaa magaalada Dhuusamareeb ee caasimada Galmudug ayaa maanta dib ugu soo laabtay Garoowe.

Deni ayaa la sheegay inuu Garoowe kaga qeyb galayo aaska iyo maamuuska loo sameynayo Raisul Wasaarihii hore ee Somalia Xasan Abshir Faarax iyo Madaxweynihii hore ee Puntland Maxamed Cabdi Xaashi oo maalmo ka hor geeriyooday.

Wararka ayaa intaas ku daraya in Madaxweyne Deni uu ku soo laaban doono Dhuusamareeb marka la soo gebagebeeyo aaska loo sameynayo masuuliyiinta geeriyootay, si uu uga qeyb galo wejiga labaad ee shirka Dhuusamareeb.

Dhinaca kale, Raisul Wasaaraha Somalia Xasan Cali Khayre iyo wafdi uu horkacayo ayaa galabta u ambabaxay magaalada Dhuusamareeb, halkaasoo uu kaga qeyb galayo shirka DF iyo dowlad goboleedyada ee halkaas ka furmaya dhowaan kaasoo looga hadlayo arrimaha doorashooyinka, iyadoo Madaweyne Farmaajo uu ku biirayo shirkaas maalmaha so socda sida ay xaqiijiyeen ilo wareedyo ku dhow Villa Somalia.