Ilaalada Madaxweyne Uhuru Kenyatta Oo Looga Maaro Waayey Cunista Maandooriyaha Qaadka.

Sida ay shaaciyeen saddexda wargeys ee ugu waaweyn Kenya oo kala ah Daily Nation, The Star iyo Standard, Ciidanka ilaalada u ah madaxweynaha Kenya, Uhuru Kenyatta, ayaa laga mamnuucay inay cunaan Qaadka

Amarkan waxaa soo saaray taliyaha ciidanka ilaalada Madaxweynaha, George Kirera, oo sheegay in cunista qaadka aysan askarta ilaalada Madaxweynaha caafimaadkooda kaliya waxyeello ku ahayn balse ay dhibaateyneyso qoysaskooda.

“Ogsoonaada in la fahmay halis caafimaad oo ay cunista jaadka u keeneyso astarta ilaalada u ah madaxtooyada iyo qoysaskoodaba.” ayuu yiri George Kirera.

Amarkan wuxuu dhaqan galayaa laga billaabo 6-da bishan July, 2020-ka, markaas wixii ka dambeeyana ma jiri doono askari ka tirsan ilaalada madaxweynaha iyo qof madaxtooyada ku sugan ama agagaarkeeda daggan oo loo oggolaan doono inuu Qaad cuno.

Askarigii u hoggaansami waaya amarkan ayaa wajihi doona ganaax adag oo ka imaanaya dhinaca maamulka inkastoo aan la shaacin inta uu le’eg yahay, Waxaa laga dhur sugayaa sida ay ciidamada gaarka u ah madaxweyne Kenyatta u joojin doonaan Qaadka ay cunistiisa la qabsadeen.