Dad Badan Oo loo Xir-xiray Qaraxii Kampala.

Ciidamada amaanka dalka Uganda gaar ahaan kuwa kahor taga waxa loogu yeero argagaxisada ayaa xabsiga dhigay dad badan oo lagu tuhmayo in ay ku lug lahaayeen qarax dhawaan ka dhacay magaalada Kampala.

Howlgal ay sameeyeen ciidamada amaanka dalka Uganda ayaa lagu xir xiray 48-qof oo looga shakisan yahay in ay ku lug lahaayeen qarax ka dhacay maqaayad kutaala Kampala , waxaana qaraxaasi ku dhintay hal qof halka tiro kalana ku dhaawacmeen.

Madaxweynaha dalka Uganda Yuweri Musevani ayaa si kulul u cambaareeyay qaraxa ka dhacay magaalada Kampala, waxa uuna Madaxweynaha weerarkaasi ku tilmaamay mid argagaxiso.

Qaraxa ka dhacay magaalada Kampala waxaa horey masuuliyadiisa u sheegatay kooxda Daacish, waxaana ciidamada amaanka Uganda adkeeyeen amaanka goobaha muhiimka ah iyaga oo sidoo kale wada howlgalo dad lagu xir xirayo.